Мери Радончиќ промовира деби-колекција

Младата дизајнерка Мери Радончиќ деновиве ја промовира својата прва колекција, која содржи 25 креации. Линијата е нејзина дипломска работа. Таа неодамна заврши на познатата „Академија ди костуме е ди мода“ во Рим. Вели дека четиригодишното студирање во Италија било големо искуство, растење и созревање за неа. При изработката на моделите ги искористила знаењата стекнати на школата.
– Во изработката на креациите применив техника на драпирање, нафалтирање и некои нови облици на превиткување на ткаенината. Се гордеам со својата прва колекција, пред с` зашто комплетно сама ја изработив, од скици, избор на материјали, моделирање, кроење, шиење и пеглање – вели Радончиќ.
Моделите се изработени од природни материјали, а наместа се користени тантелата и плетеницата. Доминираат крем-бојата и сите посветли и потемни тонови од истиот спектар. Колекцијата е наменета за девојки и за жени со изграден стил, кои свесно сакаат да се одвојат од униформираната толпа.
– Линијата им ја посветив на дамите со стил и со став, за самосвесни личности што се чувствуваат удобно во својата кожа и облека – вели таа.
Мери е ќерка на нашата етаблирана креаторка Сека Радончиќ. Вели дека со оглед на тоа што покрај себе има моден професионалец како нејзината мајка, морала постапно да ги научи сите фази на дизајнирањето.
– Кај мајка ми нема место за привилегии кога работата е во прашање. И покрај нејзиното големото влијание врз мојата работа, најважно е што таа ја поттикнува и ја почитува мојата различност, а и мојот поинаков естетски сензибилитет – вели таа.
Колекцијата нема да биде претставена со ревија, туку само преку објави во медиуми. Дел од моделите веќе е распродаден.
Ана Несторовска
(објавено во Дневник на 28 декември 2010)

Новинарот Небојша Толески промовира колекција

Модниот новинар Небојша Толески, денеска во 20 часот, во фоајето на Македонската опера и балет ќе ја претстави својата нова колекција „Меч“. Ова е негова втора ревија и ја прави по пауза од пет години. Името произлегува од мечот – како дел од инспирацијата на дизајнерот. Токму кројот се темели на мечот, односно ролките на креациите ја симболизираат дршката на мечот, корицата ги потенцира рамената, а долниот дел од мечот ги претставува долгите фустани. Останатиот дел од инспирацијата е симбиоза на минатите времиња и на урбаната реалност, со примеси на барок. Станува збор за луксузна линија, изработена од првокласна француска и италијанска тантела. Ја избрал поради нејзината нежна страна, која претставува опозит на грубоста на мечот. Со ова дизајнерот ја потенцирал борбата на контрастите, кои се забележуваат и во боите, особено црната и белата. За овој проект Толески специјално изработи накит од лиена бронза во форма на мечеви.

Драматичен луксуз со бисери

By: Ана Несторовска
Фото: Жарко Чулиќ
објавено во “Викенд”, “Дневник” на 04. 12. 2010

Фасцинирана од машката кошула и од бисерите, модната креаторка и костимограф Ивана Кнез ги трансформирала и споила во уникатни модни детали. Деновиве од нејзината работилница излезе луксузната едиција “Драма премиум”, составена од десет парчиња: јаки, пластрони и манжетни, секое од нив со рачен вез и во црно-бела комбинација.
-Уште во првата година од студирањето во Белград се разви интерес за истражување на моделите на машката кошула. Ме одушеви каква историја стои зад тоа парче од машката гардероба и како спонтано се има инфилтрирано во женскиот ормар. Секогаш ќе ми биде инспирација, и кога ќе бидам во можност, ќе наоѓам начин за повторна изведба – вели Кнез, која има дипломирано костимографија во Србија, а сега е на постдипломски студии по моден дизајн на Европскиот универзитет.

РЕДЕФИНИРАЊЕ НА ФРАНЦУСКИОТ ШИК
Идејата за линијата постоела околу две години, а во меѓувреме барала начин и материјали за соодветна изведба. Откако набавила памучно платно од Фиренца и бисери, ги реализирала замислите. Кнез и во претходните свои колекции на накит ги употребува бисерите, но овој пат успева најсофистицирано да го редефинира парискиот шик.
– Како и секое мало девојче, првата претстава за тоа како треба да изгледа една жена, јас ја добив од својата мајка, која отсекогаш била средена од глава до петици. Посебно внимание обрнува на модните додатоци и неизбежниот охридски бисер. Цело детство летувањата ги поминував во Охрид, каде што најголем дел од времето стоев “залепена” за излозите на накит. До ден-денес, не се враќам од чаршија со празни раце, мојот најомилен накит е токму од таму. А бисерот како форма, како моден детаљ е неизоставен дел од женската гардероба. Без разлика на стилот што го негува една жена мора во својата кутија за накит да има нишка бел бисер – вели Кнез.
Во колекцијата прави интересна комбинација на парче облека со накит, што функционира како моден додаток. Тоа се совпаѓа со намерата да ги инспирира македонските девојки, повеќе да истражуваат во облекувањето.
-Сметам дека жените кај нас треба малку да се опуштат при комбинирање на гардероба и накит воопшто. Во мојата летна колекција, пораката беше “носи ја својата ‘Драма’, па дури и во кујната”. Забавувајте се со парчињата што ги имате на себе, почувствувајте ја магијата на накитот, бидете женствени каде и да сте, бидејќи тоа е нашиот најсилен адут, нашиот шарм и моќ на заведување, самодовербата. А на неа се работи кога се работи на надворешниот изглед, пред се’ – вели таа.

УНИКАТНА ИМПРОВИЗАЦИЈА НА БИЗНИС ДРЕС-КОДОТ
Колекцијата е наменета за секој ден, првенствено е за дами што негуваат бизнис-изглед, но не сакаат да бидат робови на дрес-кодот.
– Наместо кошула, жените може да си дозволат “луксуз” од црна ролка и една од јаките од “Драма премиум” преку неа. Може да се додадат и манжетните и да се искомбинира со црно здолниште со висок струк и должина на колена, со што ќе го заокружат барањето на соодветниот дрес код – советува Ивана.
Колекцијата ја промовира преку медиумите. Изработи фотосесија со фотографот Жарко Чулиќ, манекенката Јасмина, во студиото на Никола Спасеноски.
Моделите од новата колекција може да се набават преку директна комуникација со креаторката. Нејзините претходни колекции може да се најдат во “Петек” во Скопје. Вели дека наредниот период ќе се фокусира на изработка на колекции на накит и малку ќе паузира со дизајн на облека.
– Овој период сум фокусирана на модели за новогодишните празници, кои ќе бидат многу светкави и ќе им овозможат на девојките да ја истакнат својата убавина во овој празничен период.

Женска елеганција инспирирана од машката мода

Ана Несторовска
објавено во “Викенд”, “Дневник” на 04. 12. 2010

Инспирирана од машката мода, младата креаторка Марија Мисајлевска ја создала својата прва самостојна колекција есен-зима 2010. Дваесет и тригодишната кичевка тргнала од фактот дека машките кроеви, кои претрпеле помали промени низ историјата, стануваат с pointeresni za `enite. S почесто припадничките на понежниот пол носат машки парчиња облека, но модифицирана, адаптирана на нивното тело.
– За изработка на колекцијата го разработив и го трансформирав машкиот крој, приспособувајќи го на женското тело. Колекцијата е наменета за смели и урбани жени со цврст карактер – вели Мисајлевска.
Колекцијата се состои од 12 вида модели, со фустани, панталони, здолништа, кошули, корсет-кошули, блузи, блуза-кошула и комбинезон. Застапени се црната и белата боја, нијанса на темносива, комбинирани со две пастелни бои на сина и портокалова.
– Користев памучни материјали во комбинација на кепер. Низ колекцијата се провлекува и рачно изработена тантела од свилен конец. Има и модни додатоци како ѓердани, беџови и чанти изработени од рециклирана стара хартија – вели таа.

МОДНО СТУДИО ВО КИЧЕВО
Неодамна го отвори своето модно студио во Кичево, каде што ја презентира својата колекција, која веќе е во продажба. Заштитно лице на моделите е манекенката Јована \еоргиева, за која Марија вели дека совршено се вклопува во атмосферата на колекцијата.
Открива дека отсекогаш ја интересирале модата, уметноста и креативноста.
– Отсекогаш сум го забележувала добриот изглед. Постепено почнав да се интересирам за дизајнот. Самата правев истражувања, цртав, изработував модни додатоци… Сето тоа ме исполнуваше – вели таа.
По завршувањето на општата гимназија во Кичево се запишала на државниот бугарски факултет “Неофит Рилски” во Благоевград. По две години студирање во Бугарија, решила да се врати во Македонија, каде што дипломира на “Академија Италијана” во Скопје.
– Огромна чест и задоволство ми претставуваше тоа што имав можност за модниот дизајн да учам од македонските креатори Никола Ефтимов и од Росица Мршиќ. И покрај нивната неуморна и успешна работа, со искуството и знаењето што ни го пренесуваа н podgotvija za profesionalna rabota vo modniot svet – veli Marija.

ПЕРФЕКЦИОНИСТ И МИНИМАЛИСТ
Досега, кај нас, се има претставено само преку групни ревии, а трипати самостојно во Бугарија. Вели дека приемот на овие ревии ја охрабрил да почне самостојна кариера. Смета дека има можност да изгради кариера во Македонија, но се надева дека во иднина ќе имам можност и пошироко да ги претстави моите колекции.
– Засега останувам на македонската модна сцена, покажувајќи го својот став пред публиката. Се уште е рано да го дефинирам својот стил на дизајнирање. Јас сум голем перфекционист и минималист. Го сакам беспрекорното совршено и прецизно работење. Не мирувам во мојата работа, постојано барам нови предизвици – вели таа.
Покрај обврските околу модниот дизајн, времето му го посветува и на својот едногодишен син Дамјан.

Милитаристички креации за ексцентрични девојки

by: Ана Несторовска
објавено на 01.12.2010 во “Дневник”

Машкиот воен костум, стилизиран и приспособен на женското тело и на  актуелните трендови е во сржта на новата колекцијата на младата македонска креаторка Теа Пупкова, која завчера со перформанс се претстави во Културниот центар ЦК во Скопје. Дизајнерката што живее и работи во Прага, за проектот „Шепотот на невидливиот војник“ била инспирирана од генералот Михаил Иларионович – Кутузов и неговата војска, од делото „Војна и мир“ на Лев Толстој. Милитаристичкиот стил го превела на свој специфичен моден начин, држејќи се до строгите линии на историскиот воен костум. Застапени се фустани, панталони, шорцови, кошули и палта, направени од природни материјали: памук, кепер, волна и памучен сетен. Дел се везени, а имаат и воени додатоци, како амблеми и ордени. Моделите во маслинеста, кафена, крем и темноцрвена боја се комплетирани со соодветен накит, чевли и чанти.
– Воениот стил се поклопува со трендовите, но колекцијата има поинтимна конотација бидејќи станува збор за проширена верзија на мојата дипломска работа, поврзана со мојот омилен лик од делото на Толстој. Кутузов ме фасцинира. Тој е инспирација сам по себе, првенствено поради својот нестереотипен, несреден, запуштен имиџ – вели Пупкова.Креациите се наменети за сите модерни и ексцентрични девојки и жени, на возраст од 20 до 35 години, кои се храбри и сакаат да експериментираат со изгледот. Нејзиниот дизајн е специфичен и авангарден.
– Себеси не се доживувам како едноставна личност, па оттука се’ што правам гледам да биде необично. Нормално, секогаш црпам инспирација од одреден стил, историски период, личности или предмети. Но се трудам тоа што го работам да е само по себе уметност – вели таа.
Пупкова во Скопје има завршено средно уметничко училиште, отсек керамика, а дипломирала моден дизајн на Европскиот универзитет. Школувањето го продолжила во Прага на магистерски студии по графички дизајн и по бизнис-маркетинг менаџмент на Универзитетот „Тифин“. Ова е нејзина прва самостојна ревија во Македонија. Досега била дел од повеќе групни изложби во рамките на студиите, а се претставила и во Прага, Брно, Милано и во Фиренца.Сега живее во Чешка, каде што е ангажирана како моден и графички дизајнер. Има своја фирма, наречена Defected Green, и работи на ревии и на изложби.
Најавува уште една промоција што ќе се одржи утре во Скопје.